i ort

Mi ìììì?…, hò bèlke i bìsi che i me riva al denòcìo.

E miii? …, mi àle già na setimana che màgne ràdìci.

E miii? …, ormai ghe hò già dàt àl verderame ai pomìdòri.

Queste àle fràsi che se sènt par àl villaggio e nei punti de incontro, cesa, cimitero, dal dotor, da Scàrtòn, in piàza e pàr le ostàrìe.

La gara, la e scominsiàda ànca stòàn. Alora…, se premiarà chi che ha svàngà e reoltà la tèra pàr primo.

al secondo posto quel che àvàrà semenà pàr primo, al terzo quel che cioàrà su pàr primo i pomidòri e i ràvànèì.

Vardandome àn cìn in giro me pàr che la se sia improntàda proprio così, la storia pàr fàr i ort.

Tuti i se ha dàt da fàr, forche che spàndea ledàn e le se impiàntea co le ponte drete fin do sul còl, vesìn al manego, pàr reoltàr la tèra.

la schena che se intòrsèa a 90 gradi fin a tòcàr col nàs la tèra, pàr ciòr su la bilùriga.

E dopo al rùmòr del restèl, che gàlìvea àl teren, coi so dènt de fèr che tirea tùt liss e ràspea i sàss.

Dopo àn bèl giret col sàrcòl, pàr fàr i concòì bèi dreti, dopo aver tirà al spàgo, e in ultima pàr càricàr tùt su la bàrèla co la pàla e penderla fin sùl ledàmèr.

Dopo tùt stò afànarse via a ciòr le semenze e le piantine, ànca qua na gàra pàr chi che le stàt bòni de spender de mànco. Chi inveze à spendest de pì i sogna già àn super-racolto, forse no ghe bastàrà doi congelatori sto àn pàr meter via la ròba.

N’altro al compra ànca àl tessuto vedo-non ti vedo (àn nome che l’e tùt àn programa) ò ben tel vede o ben àle invisibile…bhòòòò. Comunque àle stàt mes ben destìrà sora la tèra àndove che àle stàt semenà le semenzete, così ghe la ò fàtà mi ai òsèi che me magnea sempre tùt…

Qualcuni ancora pì furbo al deve aver pensà; <> Bèla pensada e alora via a cior metri de naylòn da metrghe sora le piantine così pi avanti no ocore che me sgòbe do pàr càvàr èrba, pàr forza de color nero, che a vedèr sti ort pàr che i vàe in maschera.

Però stoàn pàr tanti la ghe e n’data stòrta, stà primavera pàr che no la epìe ìùtà proprio gnènt.

Me ha confidà un che vende semenze e piantine da ort, che tanti, ma tanti de quei che olea ciàpàr al premio i èpe dovèst ricorer dànòvo da lù, pàrchè co le piove e col frèt no ghe èra nasest gnènt, e così ghe ha tocà a risemènàr da nòvo. pecà…pàr via del tèmp e dell’egoismo àl hà pèrs al primo premio àncà stòàn… (E. P.)